Carane Nulis Geguritan

 

Geguritan kang mujudake sarana kanggo medharake rasa kang ana ing ati utawa manahe panggurit kuwi ora nduweni langkah-langkah utawa cara sing pasti kanggone nggawe. nanging kanggone nggampangake nulis geguritan isa kanthi cara ing ngisor iki :

1. Nemtokake Tema

2. Nggubah tema dadi geguritan kanthi cara nemtokake tembung-tembung kang pengen digawe

3. Supaya luwih endhah isa nglebokake lelewane basa utawa majas sajrone tetembungan kang wis dipilih.

4. Milih judhul kang trep marang geguritan kang wus katulis. 

Tuladha geguritan kang isa kanggo bahan belajar nulis geguritan :

DONYA SANSAYA SUMUK

Dening: Nadhif D. S.

 

Gegodhongan wit-witan langka

Lembeyane kewan-kewan punah

Ora bisa disawang bocah-bocah

Bumi saiki wis owah

Amarga polahe manungsa srakah

Lek mung ngrusak wae... ah lanyah!

Wengi hawane panas

Awan ya mung tepas-tepas

Rasane donya wis ora laras

Manungsa kudu gumregah eling

Illegal logging kudu dipenging

Nalika alas entek tanpa sisa

Gelaran donya bakal musna, manungsa uga!

 

 

 

LAR-LAR KATRESNAN

Dening: Vivin N. H.

Semilire angin ketiga dawa

Ngelingake marang 720 dina

Luwih kang wis lumaku

Binareng iline luh lan guyu

              Ora dakkira pangucapku nalika iku

              Nuwuhake balung ing gegermu lan gegerku

              Ing balungmu ana lar irengku

              Ing balungku ana lar putihmu

Sanadyan kadhangkala luh nyenengake

Apa guyu dadi nrenyuhake

Nanging.....

Balung ora uwal

Lar ora udhar

Malah tansaya suwe.........

Balung lan lar dadi swiwi

              Saiki wis wayahe ajar mabur

              Memitran ing selaning bayu

              Kanggo mbesok nglanglang angkasa